– आचार्य समय सागरजी महाराजांची छिंदवाड्यातील दिव्य देशना;

छिंदवाडा (म.प्र.), दि. २२
संत शिरोमणि आचार्य विद्यासागरजी महाराज यांचे परम शिष्य आचार्य समयसागरजी महाराज यांची दिव्य आणि पावन देशना २१ जानेवारी २०२६ रोजी अहिंसा स्थली, गोलगंज, छिंदवाडा येथे ससंघ २४ पीछी सह भव्यपणे संपन्न झाली. या प्रसंगी हजारो श्रावक-श्राविका उपस्थित राहून आचार्यश्रींच्या अमृतमय वाणीचा लाभ घेतला.
देशनेत आचार्यश्रींनी मोक्षमार्ग, कर्मसिद्धांत आणि पुरुषार्थ यांचे अत्यंत प्रभावी आणि सोप्या भाषेत स्पष्टीकरण केले. “महाराज कुठे जात आहात?” या प्रश्नाला उत्तर देताना त्यांनी भावपूर्णपणे सांगितले, “आम्ही मोक्षाकडे प्रवास करीत आहोत.” कर्मबंधन हे आत्म्याच्या स्वतःच्या भावपरिणामांमुळे होत असते, त्यामुळे पुण्याच्या निमित्तांपासून कधीही दूर राहू नये, कारण देव-गुरु-शास्त्र यांच्या निमित्ताने सातिशय पुण्यबंध होतो, असा उपदेश त्यांनी दिला.

आचार्यश्रींनी आपल्या जीवनातील एक महत्त्वपूर्ण प्रसंग सांगितला. १९७६ साली कुंडलपूरजवळील पटेरा येथे क्षुल्लक अवस्थेत असताना, पंचम काळात मुक्ती नसल्यास साधुपदाचे प्रयोजन काय, असा प्रश्न विचारला गेला होता. तेव्हा आचार्य विद्यासागरजी महाराज यांनी दिलेले उत्तर आचार्य समयसागरजींनी भावपूर्णपणे सांगितले – “निराकुल भावालाच मोक्ष म्हणतात. जो जितका निराकुलतेचा अनुभव घेतो, तितकाच तो मोक्षाचा अनुभव घेत असतो.” ज्ञानार्णव ग्रंथाचा संदर्भ देत आचार्य शुभचंद्रजींनी गृहस्थ अवस्थेत ध्यान अत्यंत कठीण असल्याचे म्हटले आहे, हेही त्यांनी नमूद केले. मुनि आणि श्रावक यांच्या आहारातील संयमाचा फरक स्पष्ट करताना, मुनि नियमबद्ध आहार घेतात, तर श्रावक अनेकदा संयम हरपतात, याकडे त्यांनी लक्ष वेधले.